عن المجلس العسكرى.. والله الموفق والمستعان

بداية هكتب عن المجلس العسكرى اللى لسا مهددنا فى بيانه رقم 56 ان الى هيكتب عنه هيطلع تلاته تيييت تيييته فاللى خايف يخلع من البروفايل دا...
طبعا كلكم عارفين ان انا عمرى ما هغلط لا فى الجيش ولا فى المجلس السمكرى... سورى العسكرى..
هو فيه حد زى المجلس ولا حد فى طيابة المجلس.. دا قمر قمر قمر..
ياجماعه عيب وااله عيب..
هو حد يقدر ينكر ان المجلس السمكرى هو اللى حمى الثوره..
حد ينكر ان المجلس هو اللى اجبر مبارك على التنحى.. وهو اللى حطه ونظامه فى السجن..
لا طبعا اللى ينكر دا يبقى ابسلوتلى بيستعبط..
دا الجيش والشعب رجل واحده فى جزمه معفنه.. ومخرومه من قدام...ا
لجيش والمجلس.. ياسلام هو فى زيهم.. احنا كنا فين وبقينا فين..

فيها ايه يعنى لما يقول علينا قله مندسه ومدفوعين من الخارج..اعتبره ابوك ياجدع وبيهزر معاك

فيها ايه لما يبقى سايب البلطجيه يبرطعوا فى الشوارع وبيقبض على النشطاء والمتظاهرين ويديهم احكام عسكريه من 3 ل 5 واعضاء النطام بيتحاكموا مدنيا

فيها ايه لما تكون المحاكمات صوريه ولا تمت باى صله للتهم الاساسيه اللى مفروض يتحاكموا بيها.

فيها ايه لما يعينلك طقم محافظين من المجرمين المشهودلهم بالوقاحه وقلت الادب وكره الشعب ليهم.. واذا كان عاجب الشعب..

فيها ايه لما اللوا بتاع الفاشتاج يقول ان الشباب والبنات بيناموا مع بعض فى التحرير..

وفيها ايه يعنى مثلا.. لما المجلس السمكرى يأمن السفاره الاسرائليه بجيش من الامن المركزى والشرطه العسكريه ويضرب المتظاهرين بالنار ويعتقلهم ويحكم على بعضهم بعشر سنين ويسيب جلسة حبيب العادلى من غير امن عشان يحصل فوضى فياجلوا القضيه...

وبرضو ايه اللى حصل يعنى لما الطلبه معتصمين فى كلياتهم من شهور عشان العمداء اللى عينهم امن الدوله يتغيروا يقوم يفض اعتصامهم بقوات خاصه ويفصلهم والعمدا يفضلوا فى مكانهم..

فيها ايه لما المحليات تفضل زى ماهيا وهيا اس الفساد والبلاوى.

فيها ايه لما ناشط يتقبض عليه ينضرب ويتكهرب ويتعزب وياخذ كوكتيل شتايم من نوع يابن ...... ويابن.... بعدين ياخد 3 سنين سجن.

فيها ايه لما وزير الداخليه يدفع ميت الف جنيه لمحامى يدافع عن الظباط المتهمين فى قتل المتظاهرين وبقيت الظباط قاعدين فى البيت بيشيشوا ويقبضوا اخر الشهر.. ويستمر الانفلات الامنى المتعمد..

فيها ايه لما يلعبوا معانا كل يوم لعبة القط والفار ويرمولنا اشاعات عشان يشوفوا رد فعلنا ولو لقونا ساكتين ينفذوا لو كشرنا وهاجمنا يقولك ماليش دعوه بحاجه ويرزعك بيان فى اللذيذ..

فيها ايه لما يكون المجلس اياه هو الراعى الرسمى للثوره المضاده

عادى جدا خالص قووى

فيها ايه لما مبارك اللى سرق المليارات يبقى قاعد فى مستشفى خمس نجوم ويجيلوا افخم انواع الاكل ويتعالج على نفقة الدوله..ومصابى الثوره بيموتوا فى عنابر القصر العينى وابو الريش..

فيها ايه لما سوزان الى سارقة 139 مليون دولار من مكتبة اسكندريه تاخد افراج مقابل 25 مليون جنيه

فيها ايه لما الاعلام المصرى بشتم فينا ليل نهار وهو الذراع الضاربه للثوره المضاده ..

ايه ياشعب جاحد هو مافيش ادب ولا ذوق..

فيها ايه لما يكون سيادة المشير اقسم يمن الولاء امام المخلوع مبارك..وهو اللى بيحكمنا

هو الشعب دا كدا دايما يفترى.. يحب الافترى قد عنيه.. لو عملتلوا ايه مش هيرضى..

فيها ايه لما القاضى اللى حبس ايمن نور وخيرت الشاطر باوامر امن الوله يبقى هو هواه اللى بيحاكم العادلى..

فيها ايه لما طنطاوى يعترف ان مبارك امر الجيش بضرب المتظاهرين والجيش رفض.. يعنى مبارك يتحاكم بتهمة الخيانه العظمى.. لاطبعا ما يتحاكمشى دا كان بيهرء مع المشير,..

فيها يه برضه لما يحب يخلص من وزير الخارجيه عشان عامل قلق لدوله صديقه فينفيه للجامعة القلل..

فيها ايه لما يعمل مؤتمر حوار وطنى ويحضروا كم كويس قووى من اعضاء الحزب الوثنى.. بتاع من اجلك انتعشان يعملوا برامج لتطوير الدوله..

فيها ايه لما ظابط امن مركزى بنزل شباب الثوره على ركبهم ويضربهم على قفاهم ويقوله ما تتحركش يابن كذا كذا..قال عام لينلى ثورة .. هو احنا عملنا ثوره ليه؟؟
..
فيها ايه لما كل كوادر وظباط امن الدوله هما اللى ماسكين جهاز الامن الوطنى.. وشغالين بنفس الاسلوب

..
فيها ايه لما نكون كلنا عارفين ان المجلس بيطبخ الوضع عشان يمسك الحكم للابد بااما بشكل مباشر يا إما عن طرق فصيل هو مسيطر عليه..

فيها ايه لما المجلس كل شويه يهددنا بان الاقتصاد بينهار وان الاحتياطى هيخلص .. كان الدوله مالهاش اى مورد يجيب فلوس..وكأن مظاهرات الجمعه (الاجازه:) هيا اللى موقفه العجله ام بدال.. قصدى التنميه والاستقرار..


وفيها ايه وايه واييييه... ايهات كتير كدا ورا بعضها
..
كل واحد مننا له عين وودان وشايف وعارف ايه اللى بيحصل
..
ولو استمرينا فى سياسة غمض عنيك دا الجيش اخر عمود فى البيت.. بقى نقول على ثورتنا يارحمن يارحيم وننصب صوان وناخد العزا
..
ثورتنا مش هتتسرق مننا..ومش هنضرب على قفانا.. دا على جثثنا.. ودم الالف شهيد مش هيروح هدر ومستعدين نقدم قدهم عشرين مره ونعيش احرار
..
انا نازل الجمعه 27 عشان اقول للمجلس..
سيادة المجلس الموقر.. بجد لقد شحت رصيدكم..آن الاوان ان تعودوا الى ثكناتكم.. لتقوموا بدوركم الطبيعى ..وتسلموا البلاد لمجلس رئاسى مدنى .. يعرف يدير البلد وينفذ مطالب الثوره ..عشان ما نخبطشى فى بعض..اكتر من كدا واكيد اكيد هنخسر بعض..والنبى كفايه لحد هنا.. سعيكم مشكور
..
حفظ الله مصر..وشعب مصر.. والله الموفق والمستعان.

اديها طائفيه ... واولعى يابهيه

اناا لقيت الناس كلها كاتبه نوتس عن الطائفيه .. وامبابه.. قلت اشمعنى انا يعنى.. والنعمه لاكتبلكم نوت عن الطائفيه.. مش مهم هقول فيه ايه المهم انه هيتكتب..



احيانا كنت لما اسمع عن احداث طائفيه فى مكان ما واسمع عن جرحى وقتلى وبتاع اقوم واخد نفسى وطالع عالمكان عشان اشوف بعينى وافهم هو منين يودى على فين.. مره من ذات المرات.. مش فاكر انهى حادثه .. بs فاكر انى رحت المكان.. كان الزاويه تقريبا .. ووقفت اتنين فى الشارع وسئلتهم هو ايه اللى بيحصل ياشباب...

الاولاانى قال.. بص يابيشمهندس هما المسلمين جم من هنا عشان سمعوا ان ماعرفش مين مخطوفه فى المنطقه راح المسحيين جايين من هنا وبقت عاركه وولعت نار وما حدش عرف يسكتهم.. والمسحيين اترنوا علقه..

التانى قالى ...لا ياعم دا المسحييين اللى جم الاول لما عرفوا ان المسلمين عايزين يضربوهم وراحو عاملينلهم كامين واول ما المسلمين جم راحو طالعين عليهم وكالوهم علقة موت..

الاولانى.. اسكت انتا مانتاش فاهم حاجه..

التانى.. والنعمه انتا اللى ما فهم اى حاجه..

الاولانى طب يلا ياض من هنا ياض وراح زقه..

التانى انتا بتزقنى طب والنعمه ما اسايبك....

الاولانى مش هتسينى انا طب ورينى.. وراح فاتح المطواه ..

التانى.. بترفع عليا سلاح طب يانا يانتا النهارده ووهوبا المطواه التانيه اتفتحت..

وجه واحد شكله غلط وراح سائل التانى هو حد اتعرضلك بحاجه وهوبا عينك ما تشوف الا النور كانت هتولع.. ر

حت واقف ما بينهم الاتنين وبعلو صوتى صلوا عالى هيشفع فيكم.. مافيش حاجه تستاهل.. وهديتهم كدا.. قالوا عليه الصلاة والسلام.. وتبرع واحدمنم اللى واقفين.. وقال صلوا عالنبى عيب كدا..

سألتهم.. هو انتوا شفتوا اللى حصل دا.. قالولى لا بس الناس بتتقول..

قلتلهم الناس اللى قالتلكم حد انتوا عارفينه كويس..

قالولى لا ناس من اللى ماشيه فى الشارع..

قلتلهم يعنى هتتشاكلوا وتتضربوا بعض والخناقه تكبر وتولع وممكن تتقلب بغم وانتوا الاتنين ما شفتوش اللى بتتكلموا عنه.. وسمعتوه من ناس ما تعرفوهاش..

الاتنين بصوا لبعض بصه غريبه زى ما تقول دش ساقع نزل على دماغتهم.. وتبرع واحد تانى من اللى واقفين وقال.. عندك حق يابشمهنذر.. استهدوا بالله يارجاله واخذوا الشيطان ولموا السلاح ( طبعا مش عايز اقولكم انى ركبى سابت وانى كنت متوقع انى اول واحد هيتغز فى الليله.. بس الحمد لله خير)

المهم خدتهم وقعدنا عالقهوه اللى جمبنا.. وعزمتهم على شاى وقعدنا ندردش ونلعب ضمنا.. واتضحلى ان هما الاتنين اكتر من اخوات ومتربيين مع بعض..

سالت الاول اسمك ايه.. قاللى مصطفى .. سألت التانى قاللى بوليس.. طبعا انا رفعت حاجب لاعلى عليين ونزلت التانى لاسفل سافلين.. وسألت نفسى لو كانت الشكله دى كملت اكيد اكيد كانت هتقلب بشكله ما بين مسلمين ومسحيين.. وكان هيطلعلنا كامليا فى النص وتبقى ليله كوبيه..

سألتهم طب انتوا ماشركتوش فى الشكله بتاعة المسحيين والمسلمين دى.. قالولى احنا مالنا ياعم ما ان شالله يولعوا فى بعض دى عالم زباله هما الاتنين.. والاتنين اجمعوا ان ما كانلهمش صحاب فى الشكله عشان كدا ما اتشاكلوش.. قلتلهم يعنى لو كان ليكوا اصحاب كنتوا هتتتشاكلوا.. قالو يابشمهندش الاصيل بيان وقت الشده اومال نسيب اصحابنا ينضربم..

قلتلهم طب بما انكم الاتنين اكتر من اخوات..وانت مسلم وهو مسيحى.. كنتوا هتبقوا مع بعض ولا ضد بعض.. نفس الدش الساقع تانى.. والاتنين بصوا لبعض..

وقالولى والله ساعتها الظروف تحكم.. قلتلهم تحكم مين ياعمنا ..هو ينفع...

اتلخبطوا.. وقالوا ساعتها ههنفض ايدنا من الموضوع عشان .. ما نخسرشى بعض..

قلتلهم واصحابكوا كدا مش هيزعلوا.. راح بوليس قايلى ما تدربكناش بقى هيا عدت وخيير خير..المهم..كملنا القاعده وشويه وجه واحد اسمه.. على شمه.. سلموا عليه.. سألته ايه اللى حصل.. قالى دا واحد عاكس واحده صاحب اخوها (مسيحى) شافه فقاله عيب كدا.. التانى راح شاتمه قامت عاركه وحصل اللى حصل..

_________________

بكل بساطه الموضوع قلب فتنه طائفيه ومسلمين ومسحين ودم واتحول لصراع دينى وهو فى الاساس اتفه من التفاهه.. ودا غالبا بيكون سبب اى عنف بيحصل ما بين الفصيلين دول فى مصر.. وتكرار وتدخل شخصيات بدقون وجلاليب وشخصيات بملابس سوده مطرزه بالدهبى للنفخ فى النار.. ادى لوجود حزازيات جوا الفصيلين.. هما اصلا مش فاهمين اساسها ايه.بس بيعيشوا ويتعايشوا ومافيش حاجه فعلا.. لكن مجرد ما تحصل حاجه زى كدا كل اللى فى الباطن بيظهر عالسطح وكل واحد بياخد جانبه الدينى والسبب اتفه من ان يذكر.. وبتبقى ليله من اسود لياليكى يامصر.. بعد كدا السلفيين يطلعوا فى مظاهرات.. ثم المسيحين فى مظاهرات.. ويستمر العته..واغلبية المواضيع كانت ممكن تتحل من اول دقيقه .. لو كان فى حد حكيم من اهالى المنطقه.. لكن كل مره كانت الامور بتترك لحد ما توصل الى ما هو عليه..(ضيف الى ماسبق بقى حكاية استقلال الكنيسه والمجتمع المسيحى بسبب سياسات التمييز للنظام البائد.. والمشاكل اللى كانت من صنع النظام نفسه.و استقواء جزء من فصيل بالخارج والايادى الخارجيه.و... و.... و...... كميه واوات ورا بعضها كدا..وكل دا خطوات فى تأصيل الشرخ جوا المجتمع المصرى بطرفيه.. مش عارف الحكايه دى ممكن تفيد حد فى حاجه ولا لا.. بس انا قلت.. اصدعكم بيها.

فوتكم بالعافيه

..

سنقاوم مهما قالوا

عندما تننهى من معركه حامية الوطيس بدأت منذ رمن.. ضد الاستبداد والظلم.. ضد الطاغيه واعوانه وكلابه.. تنام وملء عينيك حلم واحد يداعب افكارك طوال الليل .. سننتصر..

سينصرنا الله.. فهو اعلم كم نحب هذا الوطن.. كم نعشق كل ذره من ترابه..وهو اعلم ان اقل وارخص مايمكن ان نقدمه لهذا الوطن الجريح هي ارواحنا ودمائنا وحريتنا..

نبزلها بكل حب غير اسفين على شىء .. وغير منتظرين من احد جزاءا ولا شكورا.. فوطننا هو أمنا..نفديه بكل غالى.. نضمن به رفعته ومجده.. وان يعيش ابنائه رافعين هامتهم الى اعلى عليين فخورين بانهم ابناء مصر.. ومصريتهم بالنسبة لهم هيا شىئ يتشرف به الشرف نفسه..

كان حلمنا ونحن ايضا متيقظين نقاوم على الارض باعدادنا القليله المستضعفه جيش السلطان الغاشم الظالم هو واصحابه ليس للبشر فقط بل لم ينجوا منه حتى الحجر..

كنا نقاوم فى انتظار المدد من جيشنا الاعظم.. الذى ركن الى الراحة والخضوع والانهزام والاستسلام.. والذى قال العالم باستهتار انه لن تقوم له قائمه.. لكننا كنا على اتم الثقه انه عملاق نائم ينتظر من يوقظه.. ولقد ظللنا نوقظ فيه لسنوات بمساعدة كل الرفاق على مختلف الجبهات حتى شق صوتنا اذنيه.. فتململ من نومته.. حتى جائه الصوت اقوى فانتفض من نومته.. ونظر حوله فرأى الظلم والقهر قد استشرى بين العباد من قبل السلطان وجنوده ..

فنفض عن جسده تراب الاستكانه.. وصرخ صرخت مدوية سمعها القاصى والدانى.. وزرعة الرعب فى قلب السلطان واعوانه .. وتقدم بكل قوة الى الميدان.. فاسقط الظلم وسحقه كما تسقط اوراق الخريف..والتفت الرفاق.. الذين كانوا يقاومون فى ظل نوم العملاق.. غير مصذقين انهم اخيرا ايقظوه من ثباته الذى ظنوه ابدى.. ليحتضن كل منهم الاخر.. تملئ السعاده كل ذره فى كيانهم..التفتوا ليقبل كل منهم رأس وكتف صديقه..وكانت المفاجئه المره...طعنات نافذه فى اجساد انهكها النضال ضد الظلم..تتلقى جزاءها طعنا على يد الاصدقاء..

ظن الجميع ان من طعنوا قد انتهوا وماتوا.. ووقفوا بأبنونهم فى مشهد جنائرى حزين..

وظنوا ان الخونة اصبح بيدهم الصولجان.. لكن الحقيقة ان من طعنوا.. تحولوا فقط الى عملاق ركن الى الراحة قليلا.. لكنه لن يفتئ ان يعود وبكل قوه .. فكما ايقظ جيشا اسقط طاغيه..

فبالتأكيد لن يتخلى عن وطنه او كيانه بهذه السهوله ..فهو قادم ..دون تحديد زمان او مكان..الاكيد فقط... انه قادم.. وسينتصر