بكل بساطة قلنا ياشعب مصر الدنيا ولعت الاسعار بقت نار كل حاجة سعرها بقى مضروب فى عشرة
والدنيا خربانة وما عنتوش لاقين تاكلوا حتى العيش ولا لاقين ادنى حد من الحياة الكريمة ومزلولين أخر زل ॥
طيب ايه الحل..
الحل اننا يوم 6 ابريل نعمل اضراب شامل على مستوى مصر عشان صوتنا يوصل لاتخن راس فى الحكومة لما الحكومة تخسرلها مليار ولا مليار ونص فى يوم هيعرفوا ان الشعب المصرى مش سهل وانهم لازم يتعاملوا معاه باحترام من هنا ورايح والا هياكلهم أكل .. اتنفقنا .. اتفقنا..
والله الواحد فرح قوى وقال الحمد لله الشعب المصرى شكله هيفوق وينفض عنه تراب الزل والمهانة ويقول لاتخن تخين لا والدليل اننا هنعمل اضراب.. الف حمد وشكر ليك يارب..
جاء اليوم الموعود .. يوم 6 ابريل.. النهاردة يعنى .. قلت انام براحتى واصحى على الساعة حداشر .. فى اضراب عام يعنى كل حاجة عطلانة وحلفت بالله تلاته ما انا رايح الجامعه ولا حاضر سكاشن ولا هاكل فى مطعم المدينه ( إضراب بقى )صحيت على الساعة حداشر كدا قلت اما اشوف الاجواء عاملة ازاى رحت نازل بالبارمودا وتشيرت عادى كدا قلت أتفرج على شكل مطعم المدينة الجامعية وهو فاضى يكون عامل ازاى ونازل وانا كلى انبساط وثقة ان الاضراب عامل احلى شغل الشعب فاق ياناس وصلت المطعم وياريتنى ما وصلت ايه دا لقيت زى ما يكون ثورة الجياع اندلعت المطعم مليان على عينه اكتر من أى يوم تانى ( ياداهية دقى ايه المصيبة دى )رحت مميل على اتنين اصحابى كانوا قاعدين فى المطعم بيبلغوا وقلت حسن .. قالى ايه .. قلتله مش النهارد اضراب عام ولا انا كنت بحلم .. قالى ايوة .. قلتله امال انتا بتاكل ليه فى المطعم .. قالى ياعم بلا اضراب بلا نيله هنسيب الاكل دا لمين روح روح ياخى سيبنى اكل الجوع كافر ..اتصدمت ورحت راج لورا اربع خطوات خمسة كدا ياه يالهوى مش قادرين يفوتوا وجبه واحده واجبة بس.. وبعدين ياكلوا براحتهم ..قلت فى نفسى اكيد دى حالة شاذة وقررت اطلع برة المدينة اتمشى شوية فى القاهرة وهيا فاضية اشوف يكون شكلها ازاى مش اضراب بقى يعنى كل واحد فى بيته .. لسا خراج من باب المدينة لقيت ميكروباص داخل عليا وبيبدى كلاكس والتباع اللى فيه بيقولى بصوت تخين ومجعلص كدا..ربسيس ..ياستاذ .. قلتله لا وعليا النعمة ولا ربسيس ولا غبرة حتى ..رميت عنيا يمين لقيت كل حاجة شغالة الاتوبيسات ماشية والزحمة زى ما هيا ولا كانهم سمعوا عن الاضراب اللى كل وسائل الاعلام بتتكلم عنه قلت ارمى عينى شمال ممكن يكون الشكل مختلف لقيته هوا هواه . رحت محود على اقرب مصلحة حكومية قلت اشوف فيها موظفين ولا عاملين اضراب وبقوا ناس محترمين لقيت كل موظف رامى كرشة على مكتبه وعمال يذل فى انفاس المواطنين اللى قدامة..ما اخبيش عليكوا انا جالى ازبهلاال زاتى متفشفش ورجعت المدينة مصدوم قلت اروح اقعد مع زمايلى الطلبة المثقفين اللى المفروض انهم من ارقى طبقات الشعب فهما وثقافة ومستوى وكانوا متفقين معايا على الاضراب وبيشجعونى كمان ..دقيت على اول باب ماحدش رد قلت اكيد لسا نايمين اضراب بقا . دقيت تانى .. وتالت .. طلعلى واحد من الاوضة اللى جنبهم قالى دول راحو الجامعة من الصبح يافندى .. اتصدمت برضة ..الصدمات كترت النهاردة قوى .. رحت اوضة تانية وتاالته وكله على دا الحال .. الله اكبر ايه هوادا .. فيه ايه الناس بقت معاتيه ولا ايه حلفت يمين تلاته لالبس هدومى واطلع على الجامعة اكيد الدكاترة ارقى طبقة فى الشعب واكثرها احتراما عملين اضراب خرجت وانا متأكد انى مش هلاقى دكتور واحد فى الجمعة باثتثناء بتوع الحزب الوثنى طبعا واتصدمت تانى برضة كله شغال محاضرات شغالة شكاشن ما بيعطلش كله شغال ..قلت بس انا كايد لسا نايم وبحلم .. ودا حلم وحش قوى .. ورحت داخال الحمام غاسل الجمجمة قلت يمكن افوق .. بصيت برضة لسا الوضع على ما هو عليه .. رحت مميل على واحد صاحبى خدت منه سيجارة مع انى ما بدخنش بس قلت ممكن افوق ويطلع اللى انا فيه وهم او ادوخ وانسى برضه لسا كما هوا الحال .. لاجديد تحت الشمس .. رحت خارج من الكلية ووشى تبدو عليه علاامات البله ورحت قاعد فى وسط جنينة وسرحت شوية .. قلت فى نفسى ياخسارة يامصر كنت فاكر ان ولادك جدعان يعرفوا يقفوا مع بعض ايد واحدة ولو لمدة يوم واحد ضد الفساد والزل والهوان والغلا والمسخرة اللى البلد فيها .. عشان يعرفوا يعيشوا ويلاقوا ياكلوا هما وولادهم بكرامة وما حدش يزلهم ويعيشوا بقى رلاسهم مرفوعة لفوق ..بس الشعب اثبت بكل وضوح انه مهما اتعمل فيه مش هيتحرك.. مهما اتزل واتهان مش هيتحرك .. مهما سرقت قوته ورزقه ورزق عياله مش هيتحرك .. مهما ضربته على قفاه برضه مش هيتحرك.. ادينا الاشارة الخضرا للنظام يعمل فينا اللى هوا عايزة.. هوا كده بقا مطمن خالص ان ما بين ايده شعب اجبن من الجبن وبيحب الزل والمهانة قد عنيه .. وكما قال الريس فى التلفيزيون وعلنى العلن .. ولسا كل حاجة هتغلى والايام اللى جاية اسود وأسود.. الله عليك يامعلم .. بجد الشعب المصرى اللى بيحصله دا قليل خليوكوا قاعدين وساكتين ومطاطيين لما كيلوا للحمة يبقى بميةجنيه والرز بخمسين وتموتوا من الجوع .. اوعوا تعترضوا .. خليكوا طيبين ومسالمين كدا على طول .. شعب زبا.... صحيح
No comments:
Post a Comment