خطاب هام جدا من الزعيييم المفدى الخالد دائم الحكمة..الى شعبه العزيز الودود المسالم.. Share

فى دوله غير دولتنا الامنه المستقره الديموقراطيه


مشهد1..

داخل قاعة المؤتمرات الرئيسيه للدوله..

الزعيم الخالد يقف على المنصه
ولا بلاش المنصه لتتفهم غلط

يقف على الاستيدج

تصفيق حاد لمدة اربع ساعات وخمسه وعشرين دقيه وسته وتلاتين ثانيه

يشير الزعيم بيده لكى يتوقف التصفيق فهو لا يحب من يصفق له وينافقه



اخوانى الاعزاء
كما تعودنا دائما فى اوقات الفرح والشده
ان نجلس معا جلسة اخوة نتناقش فى مشاكلنا
وبمناسبة ازمة المياه التى تسبب لنا فيها اعداء الوطن
فلذا انى اقول لكم بكلمات واضحه

شد الحزام يامواطن منك له..
من هنا ورايح ممنوع استخدام الميه
الا للشرب دا قرار جمهمورى وما تشربش الا
لما تكون عطشان وبقالك تلت اربع ايام ماشربتش
ساعتها مسموحلك تشرب ربع كباية ميه صغيره
ممنوع الحمى خااااااااالص مالص
يعنى اللى هيتقفش بيستحمى احتمال
كبير يتعدم ..
ولو ما عدمتوش هيتسجن ومش هيشوف الميه فى السجن لغاية ام يموت من العطش
وأه وأه لو شفتك بترش ميه دا انا هطلع عينك...اعدام بالرصاص فى الطريق العام
ومافيش وضوء
اللى عايز يصلى يتيمم انا حذرتكم اهه اللى هيتوضى هسجنه مدى الحياه
وبالنسبه للفلاحين
اللى هيقرب من الميه ولا يفكر مجرد تفكير اوحتى الفكرة تمر على دماغه انه يروى ارضه
هدفنه فى مكانه
ممنوع الطبخ منعا باتا..اى نقطة ميه احنا اولى بيها..كلوا اى حاجة ناشفه..
البيت اللى هشم فيه ريحة طبيخ ههده على دماغ صحابه
انا حذرت اهو.وطبعا مش محتاجة فكاكه
اكيد الشاى والقهوه واى مشروب يدخل فى تكوينه الميه ممنوع
نفس عقوبة اللى هيستحمى هتتطبق عليه
انتوا عارفين احنا حكومه رشيده.. ودولة مؤسسات..وبنعرف نحل ازامانتا كويس
ومافيش حل للازمة الميه غير التفاوض
التفاوض وبس.. زى ما عملنا مع اخواتنا الصورمائلين وخدنا ارضنا..
صحيح هيا منزوعة السلاح وممكن صورمائيل تاخدها فى ربع ساعه..
بس الحمد لله ارضنا فى حضننا..
نكمل كلامنا الاخوى..
صحيح الميه ممكن تتقطع عننا عشرة عشرين سنه
لغاية ما يسمحولنا بشوية ميه صغيرة على القد كدا
بس دا اكيد احسن ميت مرة من اننا ندخل فى حرب
احنا ابنائنا غاليين علينا ودمنا غالى
فيها ايه يعنى اما نموت من العطش..

احنا شعب مكافح وقدها وقدود
واكيد دا احسن
ماتموت مقتول فى حرب برصاصه ولا صاروخ

اما بالنسبه لسكان فارهينا والناس اللى عنده بسينات
وجولف وكدا
اقول لهم واحذرهم بشده
واقول لهم بكلمات واضحه
شديدة الصرامه والحزم
واحذرهم مرات ومرات
وسنضرب بيد من حديد من يخالف منهم...
ياريت ماتغيروش مية البيسين كل يوم
خلوها كل يومين
احنا داخلين على ازمة ولازم انتوا كمان تشاركوا فى حلها معانا
وتكونوا عونا للشعب.

شد الحزام يامواطن منك ليه...
ماعدش فى ميه جايه
ولازم نكون على قد المسؤليه الملقاة على عاتقنا

وابقى اشوف كلب من الخائنين فتح بقة ولا اعترض..
انتو عارفين انا بعمل فى المعارضين من الخائنين للوطن ايه..

وشكرا اخوتى
ودامت بيننا المحبه
والود والاخاء
والسلام عليكم ورحمة الله

تصفيق حاد

عضو من اعضاء الحزب القطنى الحاكم

يصرخ ويهتف بكل حماس

عاش الزعيم الحكيم

كل من فى القاعه
عاش عاش عاش
وظلوا يكررونها
لمدة خمس ساعات الا ربع تقريبا

صوت فردى من الجانب الايمن للقاعه يصرخ::

ربنا يخليك لينا ياريس

صوت اخر من الجانب الاخر::

كلنا بنحبك ياريس

ينظر لهم الزعيم نظرة ساخره...
وعلى شفتيه ابتسامة رضا
ويأخذ نفسا عميقا ويقول::

استعنا على الشقى بالله
انتوا لسا شوفتوا حاجه


ظلام تدريجى واضاءه مسلطه على الزعيم لحين خروجه

والكل يحاول لمسه لاخذ البركه من لمسته الحكيمه
ــــــــــــــــــــــــــ

ــــــــــــــــــــــــــــــــ


مشهد 2....
جنازة جماعيه للشعب
وأول نعش كان للرجل الذى هتف فى القاعه
وخلفه الصوتين الجانبيين
ثم اعضاء الحزب القطنى
ومن ثم الشعب
والزعيم وحكومته ورجال الاعمال يقفون يبكون ويزرفون الدموع على هذا الشعب المسالم الخانع الذليل الذى لن يجدوا مثله مرة اخرى مهما حصل
وكلمات حزينه متبادله

الريس::
هيوحشونى جدا والله

رئيس الوزراء ::
وهو يمصمص شفتيه

هو كان فى زيهم

احد الوزراء::
والله كانوا اجدع ناس دايما جمبك وبيساندوك
مهما عملت


وزير اخر::
اكلناهم التراب ودوقناهم الذل
بس فعلا الاصيل اصيل


رجل اعمال كبير ::
يلا رحمة الله عليهم
بجد كانوا ناس زى الفل
اشطه

موسيقى حزينه مع خفوت تدريجى للاضواء



ـــــــــــــــــــــــــــــ


مشهد 3...
يعودون الى القصر الملكى(الجمهورى سابقا) ويشربون بعض العصائر المرطبه ويتخذوا عدة قرارات


قرارت رئيس الدوله القائد المفدى...

1- بيع الدوله للمثتثمرين ما عدا بلد واحد...شرن الفسيخ
عشان عزيزه عليهم قوى


2- ينتقلوا جميا لشرن الفسيخ...شمش وميه وهوا وحاجات تانيه..

3- اخذ اقرار وتعهد على من يشترى الدوله بعدم تغيير اسمها او علمها نهائيا
فهى دوله خالدة ذات حضاره رقم سنينها عديد الاصفار ولا يمكن ان يمحى اسمها مهما مر الزمن
فهذ هو العار والخيانه الحقيقيه
ونحن لن نخون وطننا العزيز يوما

(قالها الزعيم الخالد بحزم واضح وشموخ ووطنيه تظهر عمقها للاعمى)


اخذت وزير من الوزراء الحماسه بعد سماعه القرار الثالث فقال::
نموت نموت ويحيا الوطن والعلم..

رد عليه الزعيم ساخرا::
لو فيها موت..يتحرق العلم على الدوله


انا رايح شرن...حد جاى معايا...

الجميع فى نفس واحد::

نحن ورائك يازعيم..

.....

ظلام تدريجى

وظهور اسماء الابطال بالتدرج

الرئيس والوزراؤ ورجال الاعمال

مع اغفال مقصود لذكر اى اسم لاى شخص من الشعب
والحى ابقى من الميت

ـــــــــــــــــــــــــــــ

كتبها::
احسان سلطان
2010